Datganiad i’r wasg gan Lywodraeth Cymru ar brosiect Cysylltu Gylfinir Cymru a gaiff ei arwain gan GWCT
“Roedd yn wych cael y Dirprwy Brif Weinidog Huw Irranca-Davies allan ar gyfer prosiect Cysylltu Gylfinir Cymru, prosiect yr ydym ni yma yn GWCT Cymru yn ei arwain mewn partneriaeth ag Awdurdod Parc Cenedlaethol Bannau Brycheiniog a Thirwedd Genedlaethol Bryniau Clwyd.
“Gwelodd y gwaith sy’n cael ei wneud i fynd i’r afael â’r materion allweddol sy’n effeithio ar bridio’r gylfinir ledled Cymru, un ohonynt yw ysglyfaethu wyau a chywion. Mae rheoli ysglyfaethu yn allweddol pan fydd rhywogaeth yn agosáu at ddiflannu, gan fod pob wy neu gyw a gollir yn cael effaith sylweddol ar oroesiad y rhywogaeth honno.
“Mae ysglyfaethu yn fygythiad sylweddol i’r Gylfinir ym mhob cam o’r tymor bridio, wedi’i yrru’n bennaf gan ddwysedd uchel o ysglyfaethwyr cyffredinol yn y dirwedd.
“Pan fydd gylfinir ac adar eraill sy’n nythu ar y ddaear yn dychwelyd i fod â phoblogaeth ffyniannus iach, bydd yr angen i reoli ysglyfaethwyr yn dod yn llai hanfodol.” Dewch i ddarganfod mwy am brosiect Cysylltu Gylfinir Cymru yn stondin GWCT yn Sioe Frenhinol Cymru ddydd Mercher (23 Gorffennaf) pan fydd yr holl bartneriaid yno i ateb cwestiynau a bydd trafodaeth banel rhwng 2pm a 3pm.
Mae Cysylltu Gylfinir Cymru yn brosiect cadwraeth ar gyfer yr adar hirgoes. Cefnogir y prosiect gan Gronfa Rhwydweithiau Natur Llywodraeth Cymru, drwy Gronfa Dreftadaeth y Loteri. Mae miliwn o bunnoedd wedi’u dyrannu i gefnogi gylfinir sy’n bridio ledled Cymru.
Ei nod yw mynd i’r afael â’r materion allweddol sy’n arwain at lwyddiant isel bridio’r gylfinir yng Nghymru, monitro a deall poblogaethau’r gylfinir, gweithredu camau i amddiffyn nythod, rheoli ysglyfaethwyr a gwaith ar gynefinoedd.
Rhagwelir y bydd y gylfinir bridio yn diflannu yng Nghymru erbyn 2033, felly agwedd bwysig o’r prosiect yw cysylltu’r dirwedd a’r bobl â’r adar eiconig hyn.
Mae tîm o Swyddogion Gylfinir a Phobl ymroddedig yn gweithio’n agos gyda ffermwyr, tirfeddianwyr a rheolwyr tir, a gwirfoddolwyr i wella llwyddiant poblogaethau lleol y gylfinir ledled Cymru.